ನ್ಯೂಟ್ರಿನೊ ಮಹಾತ್ಮೆ

ನ್ಯೂಟ್ರಿನೊ ಮಹಾತ್ಮೆ

ಡಾಕ್ತರ್ ಕೆ. ಆರ್. ಎಸ್. ಮೂರ್ತಿ

ಮಟ ಮಟ ಮಧ್ಯಾನ್ಹದಲ್ಲಿ ನಿಮ್ಮ ಮೇಲೆ, ಪ್ರತಿ ಚದುರ ಸೆಂಟಿ ಮೀಟರಿನ ಮೇಲೂ, ಸುಮಾರು ಅರವತ್ತೈದು ಬಿಲಿಯನ್ನು ನ್ಯೂಟ್ರಿನೊಗಳು ತುಂತುರು ಸ್ನಾನ ಮಾಡಿಸುತ್ತವೆ. ಭೂಮಿಯ ಮೇಲೆ ಸುರಿಯುವ ಈ ನ್ಯೂಟ್ರಿನೊಗಳು ಪ್ರಮುಖವಾಗಿ ಸೂರ್ಯನಿಂದ ಬರುತ್ತವೆ. ಆದ್ದರಿಂದ, ಸೂರ್ಯನು ಎಲ್ಲಿ ಭೂಮಿಯ ಮೇಲೆ ಎಲ್ಲಿಲ್ಲಿ, ಯಾವಾಗ ನೇರವಾಗಿ ತಲೆಯ ಮೇಲೆ ಕಾಣ ಬರುತ್ತಾನೋ ಅಲ್ಲೆಲ್ಲಾ ಇಷ್ಟೊಂದು ನ್ಯೂಟ್ರಿನೊ ಸುರಿಮಳೆ ಅತೀವ್ರ; ಮಿಕ್ಕೆಲ್ಲ ಸಮಯದಲ್ಲಿ ಸೂರ್ಯನು ಇರುವಾಗಿನ ಭೂಮಿಯ ಭಾಗದಲ್ಲೆಲ್ಲಾ ಅತೀವ್ರ ಅಲ್ಲದಿದ್ದರೂ, ಬಹಳವೇ ನ್ಯೂಟ್ರಿನೊಗಳು ಬೀಳುತ್ತಿರುತ್ತವೆ

ಅರವತ್ತೈದು ಬಿಲಿಯನ್ನು ಅಂದರೆ, ೬೫ ಬರೆದು ನಂತರ ಒಂಬತ್ತು ಸೊನ್ನೆ ಬರೆಯಬೇಕು. ಸೂರ್ಯನಿಂದ ಬೆಳಕು ನಮ್ಮ ಮೇಲೆ ಬೀಳುವುದು ನಮಗೆ ಗೊತ್ತಿದೆ. ಏಕೆಂದರೆ ಬೆಳಕು ನಮ್ಮ ಕಣ್ಣಿಗೆ ಕಾಣುತ್ತದೆ. ಬೆಳಕು ವಿದ್ಯುತ್ - ಅಯಸ್ಕಾಂತ ಸ್ಪಂದನ ರೂಪ ಮತ್ತು ಅದಕ್ಕೆ ಸಹಜವಾದ ಪ್ರತಿಕ್ರಿಯೆಯನ್ನು ಅದು ಬೀಳುವ ಮತ್ತು ಚಲಿಸುವ ಕಡೆಯಲ್ಲೆಲ್ಲಾ ಪ್ರದರ್ಶಿಸುವುದರಿಂದ, ಬೆಳಕು ತನ್ನ ವಿದ್ಯುತ್ ಕಾಂತ ಮತ್ತು ಅಯಸ್ಕಾಂತ ಗುಣದ ಮೂಲಕ ಎಲ್ಲ ವಸ್ತುಗಳ ಮೇಲೂ ಪರಸ್ಪರ ಪ್ರಭಾವವನ್ನು ಬೇರುತ್ತದೆ. 

ಆದರೆ, ನ್ಯೂಟ್ರಿನೊ ಮಾತ್ರ ವಿದ್ಯುತ್ ಕಾಂತ ಅಥವಾ ಅಯಸ್ಕಾಂತ ರಹಿತ. ಆದ್ದರಿಂದ, ಅದು ನಮ್ಮ ಮೇಲೆಯಾಗಲೀ, ಯಾವುದೇ ವಸ್ತುವಿನ ಮೇಲೆಯಾಗಲೀ ಬಿದ್ದರೂ, ಸ್ವಲ್ಪವೂ ಪ್ರತಿಕ್ರಯಿಸದೆ ತೂರಿ ಹೊರಗೆ ಹೋಗಿ ಬಿಡುತ್ತದೆ. ಅದು ಚಲಿಸುವ ದಾರಿಯಲ್ಲೂ ಅದಕ್ಕೆ ಪ್ರತಿಕ್ರಿಯೆಯಿಂದ ನಿರ್ವಾಣ!

ಬೆಳಕು, ಉದಾಹರಣೆಗೆ ಗಾಜು, ಪಾರದರ್ಶಕ ವಸ್ತುಗಳ ಮೂಲಕ ಸುಲಭವಾಗಿ ತೂರಿ ಹೋಗುತ್ತದೆ. ಆದರೆ, ಪಾರ ದರ್ಶಕದ ಮೇಲೆ ಬಿದ್ದ ಬೆಳಕು ಶೇಕಡ ನೂರರಷ್ಟು ತೂರಿ ಹೋಗುವುದಿಲ್ಲ. ಅಪಾರ ದರ್ಶಕ ವಸ್ತುಗಳು ಅನೇಕ. ಅಪಾರ ದರ್ಶಕ ವಸ್ತುಗಳು ಬೆಳಕಿಗೆ ತೂರಿ ಹೋಗಲು ಬಿಡುವುದಿಲ್ಲ. 

ನ್ಯೂಟ್ರಿನೊ ವಿದ್ಯಮಾನಗಳೇ ಬೇರೆ. ಭೂಮಿಯ ಮೇಲೆ ಬಿದ್ದ ಎಲ್ಲಾ ನ್ಯೂಟ್ರಿನೊ ಚಕ್ಕನೆ ತೂರಿ ಪರಾರಿ! ಸೂರ್ಯನ ಒಳಭಾಗದಲ್ಲಿ ಹುಟ್ಟುವ ನ್ಯೂಟ್ರಿನೊ ಸೂರ್ಯನ ಮೈಯೊಳಗಿಂದಲೇ ಕಿಂಚಿತ್ತೂ ಅಡೆ - ಚಡೆ ಇಲ್ಲದೆ ಹೊರಗೆ ಬಂದು ಎಲ್ಲಾ ದಿಕ್ಕಿನಲ್ಲೂ ವಿಸ್ತರಿಸುತ್ತದೆ. ಆದರೆ, ಅಚ್ಚರಿಯೆಂದರೆ, ಬೆಳಕು ಕೂಡ ಅಷ್ಟು ಸುಲಭವಾಗಿ ಸೂರ್ಯನ ಮೈಯನ್ನು ಬೇಧಿಸಿ ತಪ್ಪಿಸಿ ಕೊಳ್ಳಲಾರದು. 

ನ್ಯೂಟ್ರಿನೊ ಮಹಾ ಕಣಕ್ಕೆ, ಇಲ್ಲಿ ಮಹಾನ್ ಚಿಕ್ಕದೆಂದೂ, ಮಹಾನ್ ಗುಣಗಳೆಂದೂ ಅರ್ಥ ಮಾಡಿಕೊಳ್ಳಿ, ತಡೆ ಹಾಕುವುದು ಸೃಷ್ಟಿಯಲ್ಲಿ ಯಾವುದೂ ಇಲ್ಲ. ಇದೇ ಕಾರಣದಿಂದಲೇ ವಿಜ್ಞಾನಿಗಳು ಯಾವ ಯಂತ್ರ - ಉಪಕರಣಗಳನ್ನು ಉಪಯೋಗಿಸಿ ನ್ಯೂಟ್ರಿನೊ ಸಂಶೋಧನೆ ಮಾಡ ಬೇಕೆಂಬುದೇ ಸುಲಭವಾಗಿ ಅರಿಯದೆ ತಲೆ ಕೆಡೆಸಿಕೊಂಡಿದ್ದಾರೆ. 

ವಿಜ್ಞಾನಿಗಳು ಅಂದರೆ ತಲೆ ಕೆದರಿಸಿ ಕೊಂಡಿರುವ, ತಮ್ಮ ಅಲಂಕಾರದ ಬಗ್ಗೆ ಕಾಳಜಿಯನ್ನೇ ಬಿಟ್ಟು "ಅಲಂಕಾರ ಸನ್ಯಾಸ" ಹೊಂದಿದವರು ಎಂದು ನಾವು ಚಲನ ಚಿತ್ರಗಳಲ್ಲೂ ಮತ್ತು ಬೇರೆ ಮಾಧ್ಯಮಗಳಲ್ಲೂ ತಿಳಿದಿದ್ದೇವೆ.  ನ್ಯೂಟ್ರಿನೊ "ಮುಖ ತಪ್ಪಿಸಿ ಕೊಂಡು" ಸೃಷ್ಟಿಯಲ್ಲೆಲ್ಲಾ ಅಲೆ ತಿರುಕನಾಗಿ ಚಲಿಸುವುದರಿಂದ, ಮತ್ತು ಚರಿಸುವುದರಿಂದ, ವಿಜ್ಞಾನಿಗಳಿಗೆ ತಲೆ ಬಿಸಿ. ಅತಿ ಆಳವಾದ ಗಣಿಗಳ ಒಳಗೂ, ಮೈಲಿಗಟ್ಟಲೆ ಮಂಜುಗಡ್ಡೆ ಪೇರಿಸಿ ಕೊಂಡಿರುವ ಭೂಮಿಯ ಧ್ರುವಗಳಲ್ಲೂ ಆಳವಾಗಿ ಕೊರೆದು ಹುಡುಕೀ - ಹುಡುಕೀ ವಿಜ್ಞಾನಿಗಳು ಅವಸ್ಥೆ ಪಡುತ್ತಿದ್ದಾರೆ. 

"ವಿದ್ಯುತ್ - ನಾಚಿಕೆ" ಇದ್ದಾಗ ಮತ್ತು ಪ್ರತಿಕ್ರಿಯೆಯೇ ಪತ್ತೆ ಇಲ್ಲವಾಗಿರುವಾಗ ನ್ಯೂಟ್ರಿನೊ ಎನ್ನುವ ಕಣದ ಇರುಹನ್ನು ಪತ್ತೆ ಹಿಡಿದದ್ದು ಹೇಗೆ? ನಿಮ್ಮ ತಲೆಯಲ್ಲಿ ಇಂತಹ ಪ್ರಶ್ನೆಯು ಬಂದಿರಲೇ ಬೇಕು! 

ವಿಜ್ಞಾನಿಗಳು ಅಣು ಲೋಕದಲ್ಲೂ, ಮತ್ತಿತರ ಖಗ ಲೋಕದಲ್ಲಿ ಚಲಿಸುವ ಮತ್ತು ಖಗ ಲೋಕದಿಂದ ಭೂಮಿಯ ಮೇಲೆ ಬೀಳುವ ಕಣಗಳನ್ನೂ ಸಂಶೋಧಿಸುವಾಗ ಪ್ರತ್ಯಕ್ಷವಾಗಿ ಮಾನವ ಲೋಕದಲ್ಲಿ ವಾಸಿಸುವ ನಮಗೆ ಸಿಗದ ಮತ್ತು ಸುಲಭವಾಗಿ ಅರಿಯದ ಸೃಷ್ಟಿಯ ಗುಟ್ಟನ್ನು ಪರೋಕ್ಷ ರೀತಿಯ ವೈಜ್ಞಾನಿಕ ರೀತಿಗಳಿಂದ ಸಂಶೋಧಿಸುತ್ತಾರೆ. ಬಹಳ ಸಾರಿ, ಗಣಿತ ಶಾಸ್ತ್ರದ ಮೊರೆ ಹೋಗುತ್ತಾರೆ. ಇಂತಹ ಸಂಶೋಧನಾ ತಂತ್ರಗಳಿಂದ ನ್ಯೂಟ್ರಿನೊ ನಂತಹ ಷಂಡ ಕಣಗಳನ್ನು ಭಂಡತನದಿಂದ ತದೇಕ ಚಿತ್ತದಲ್ಲಿ ಪರೋಕ್ಷವಾಗಿ ಪರೀಕ್ಷಿಸಿ, ಪರಿಶೀಲಿಸಿ, ಅಧ್ಯಯನವನ್ನು ಮಾಡುತ್ತಿದ್ದಾರೆ. ವಿಶೇಷ ಸಂದರ್ಭದಲ್ಲಿ ಮಾತ್ರ ನ್ಯೂಟ್ರಿನೊ ಅತಿ ಕ್ಷೀಣವಾಗಿ ಪ್ರತಿಕ್ರಿಯಿಸುತ್ತದೆ. ಮೂರು ತರಹದ ನ್ಯೂಟ್ರಿನೊ ಇವೆಯೆಂದೂ, ಅವು ಒಂದು ಸ್ಥಿತಿಯಿಂದ ಇನ್ನೊಂದಕ್ಕೆ ವಿಶೇಷ ಸಂದರ್ಭಗಳಲ್ಲಿ ಮಾತ್ರ ಪರಿವರ್ತನೆಗೊಳ್ಳುತ್ತದೆ ಎಂದೂ ವಿಜ್ಞಾನಿಗಳು ನಿರ್ಧರಿಸಿದ್ದಾರೆ.

ರೇಡಿಯೋ ಆಕ್ಟಿವ್ ಡಿಕೇ ಸಮಯದಲ್ಲಿ ಹುಟ್ಟುವ ನ್ಯೂಟ್ರಿನೊ ನ್ಯೂಕ್ಲಿಯರ್ ರಿಯಾಕ್ಟರ್ ನಲ್ಲೂ 

ಹುಟ್ಟಿ ಬಹಳ ಬೇಗ ತಪ್ಪಿಸಿಕೊಂಡು ಪರಾರಿಯಾಗುತ್ತದೆ. ರಿಯಾಕ್ಟರ್ ನಲ್ಲಿ ಅಣು ಕ್ರಿಯೆಗಳಾಗುವಾಗ ಉತ್ಪನ್ನವಾದ ಶಕ್ತಿ ಗಳನ್ನೆಲ್ಲಾ ಲೆಕ್ಕ ಹಾಕಿ ನೋಡಿದರೆ, ನ್ಯೂಟ್ರಿನೊಗಳಿಗೆ ಸಂಭಂದ ಪಟ್ಟ ಶಕ್ತಿಯಲ್ಲಿ ನ್ಯೂಟ್ರಿನೊ "ಆಟಕ್ಕುಂಟು, ಲೆಕ್ಕಕ್ಕಿಲ್ಲ" ಎನ್ನುವ ಹಾಗೆ ಅದಾಗ, ಇವೆಲ್ಲಾ ನ್ಯೂಟ್ರಿನೊ ಮಹಾತ್ಮೆ ಎಂದು ವಿಜಾನಿಗಳು ಹೇಳುತ್ತಾರೆ. 

ನ್ಯೂಟ್ರಿನೊ ಸೂರ್ಯನಿಂದ ಅಲ್ಲದೆ, ಸೂಪರ್ ನೋವಾ ಇತ್ಯಾದಿ ಭೃಹತ್ ಸ್ಫೋಟವಾದಾಗ ಉತ್ಪನ್ನವಾಗಿ, ಎಲ್ಲಾ ದಿಕ್ಕಿನಲ್ಲೂ ಹರಡುತ್ತದೆ. 

ನೀವು ಸೂರ್ಯನ ಬಿಸಿಲಿನಿಂದಲೇ ತಪ್ಪಿಸಿಕೊಂಡು ಮನೆಯೊಳಗೇ ಬಚ್ಚಿಟ್ಟು ಕೊಂಡರೂ, ಗವಿಯೊಳಗೆ ತೂರಿ ಕಣ್ಣು ಮುಚ್ಚಿಕೊಂಡರೂ, ನ್ಯೂಟ್ರಿನೊ ನಿಮ್ಮ ಮೇಲೆ ಮಳೆಯನ್ನು ಸುರಿಸಿ,ನಿಮ್ಮ ಮೂಲಕ ತೂರಿ, ನಿಮಗೇ ಗೊತ್ತಾಗದಂತೆ ಓಡಿಹೋಗುತ್ತದೆ.